優質水果展介紹13款台灣特產

台灣食品喺香港有一定捧場客，負責推廣嘅台北貿易中心董事總經理劉錫威上周五特登喺台灣入咗條重約十五、六斤嘅大龍躉，情商酒樓炮製「龍躉四食宴」，款待多名本港台灣食品入口商同埋台灣駐港機構，其中一道荷香麒麟蒸龍躉球，大家食到津津有味。


三位台灣駐港機構頭頭落力推廣台灣食品，左起觀光協會香港辦事處主任陳造明、劉錫威、賓仕洋行董事陳錦泉、陳光丕。（余素月攝）

激讚荷香麒麟蒸龍躉球
當日席設永安九龍中心嘅聯邦金閣酒家，龍躉四食嘅菜式包括沙參玉竹燉龍躉骨、荷香麒麟蒸龍躉球、碧綠炒龍躉球及米湯浸龍躉頭腩。酒家副經理Simon話，香港八、九成龍躉來自台灣，佢哋酒樓供應嘅龍躉、青斑就係台灣嚟嘅，所以廚師炮製甚有心得。

荷香麒麟蒸龍躉球係將魚背肉起片，再伴以金華火腿同埋冬菇片，放喺鋪咗荷葉嘅竹籠蒸至八成熟，最後落番上湯令魚肉熟透即可上碟，食落肉質鮮甜彈牙，一眾座上賓都讚不絕口。

除咗台灣駐港機構觀光協會香港辦事處主任陳造明、遠東貿易中心主任陳光丕之外，有份大快朵頤嘅仲有本港台灣食品入口商華記永昌、味一食品同埋賓仕洋行等代表。


荷香麒麟蒸龍躉球


米湯浸龍躉頭腩